Q: சார். தற்போது நவீன காலகட்டத்தில் ஒவ்வொரு நாளும் ஆண்ட்ராய்டு போனில் பயன்படுத்தக் கூடிய சிவில் பொறியியலுக்கு பயன்படுத்தக்கூடிய செயலிகள் (ஆப்ஸ்-மென்பொருட்கள்) வெளியாகின்றன. ஆனால் அது பற்றியெல்லாம் உங்களைப் போன்ற அனுபவம் வாய்ந்த மூத்த பொறியாளர்கள் அறிமுகப்படுத்துவது இல்லையே ஏன்? அது போன்ற பயனுள்ள கட்டுரைகளை உங்களிடமிருந்து எதிர்பார்க்கிறோம் ஐயா! - ஆர்.சுந்தர், திருச்சி.

மன்னியுங்கள். என்னிடம் ஆன்றாய்டு ஃபோன் இல்லை. எனவே சிவில் பொறியியல் செயலிகள் (ஆப்ஸ்) பற்றி எனக்குத் தெரியாது.

Q: நான் அரை கிரவுண்ட் மனையில் 1600ச.அடியில் ஜிூ1 வீடு படப்பையில் கட்ட இருக்கிறேன். இந்த வீட்டிற்கு ஆர்.எம்.சி கான்கிரீட் பயன்படுத்தலாமா? ஏன் கேட்கிறேன் என்றால் மிகச் சிறிய அளவிலான கட்டுமானங்களுக்கு ஆர்.எம்.சி கான்கிரீட் உகந்ததா? ஆர்.எம்.சி கான்கிரீட்டின் தரம் நம்பகத்தன்மை மிக்கதா? நிறைய நான் - பிராண்டட் ஆர்.எம்.சி கம்பெனிகள் சந்தையில் உள்ளன. நாங்கள் எந்த பிராண்டிற்கு முக்கியத்துவம் தரவேண்டும்? மேலும் ஆர்.எம்.சி.யின் தரத்தை என்னை போன்ற சாதாரண மக்கள் எப்படி உறுதி செய்துக் கொள்வது என்பதை விரிவாக கூறுங்கள். -ஜி. பிரபாகர், வங்கி அதிகாரி - படப்பை.

வீடுகள் கட்டுவதற்கு எந்தவிதத் தயக்கமுமின்றி முன் தயாரித்த ஆயத்த காங்கிரீட்டைப் (ஆர்.எம்.சி) பயன்படுத்தலாம்.  எல்லா நிறுவனங்களும் ISI (B 15) சான்றிதழ் பெற்றே தரக்கட்டுப்பாடுகளுக்குட்பட்டே ஆர்.எம்.சி காங்கிரீட்டைத் தயாரிக்கின்றன.  எனவே ஒரு குறிப்பிட்ட பிராண்டைப் பரிந்துரை செய்வது தொழில் அறமன்று. ஆர்.எம்.சி யின் தரத்தை உறுதி செய்து கொள்ள ஒவ்வொரு லாரி லோடிலிருந்தும் - மாதிரி காங்கிரீட் எடுத்து சோதனைப் பெட்டிகளில் வார்த்து வைத்து 7 நாட்கள் மற்றும் 28 நாட்கள் அமுக்கு தாங்கு வலிமையினை பொறியியற் கல்லூரிகளில் சோதனை செய்து தெரிந்து கொள்ளலாம்.

Q: சார் சாமன்யனான எனக்க ஒரு சந்தேகம்... சாதாரணமாக ஒரு கட்டத்தின் அஸ்திவாரம் நீர் நிலைகள் மீது கட்டினால் அது உறுதியாக நிற்காமல் மெல்ல உள்ளே போகும்,,, என்கிறார்கள்... மவுலிவாக்க கட்டட விபத்தின் காரணம் கூட அது ஒரு ஏரியில் அமைந்த கட்டடம் என்பது தான் என செய்திகள் வந்தன... அப்படியயனில் ஆறுகளில் பில்லர்கள் அமைத்து பாலங்கள் கட்டுகிறார்களே... அது எப்படி நிற்கிறது? அது என்ன தொழிற் நுட்பம்? - ஜீவா, திருவள்ளூர்

திரு. ஜீவா அவர்களே.  நீங்கள் ஒரு சாமானியனாக இருப்பதாலேயே சில தவறான பொறியியல் தொழில் நுட்பக் கருத்துரைகளைத் தெரிவிக்கிறீர்கள்.  நீர் நிலைகள் மீது சரியான பொருத்தமான அடித்தளம் (Under reamed piles bored insitu compaction piles precast concrete sheet piles போன்றவை) அமைத்துக் கட்டினால், கட்டடம் கண்டிப்பாக மெல்ல உள்ளே போகாது என்பதைப் புரிந்து கொள்ளுங்கள். மவுலிவாக்க பன்மாடிக் கட்டட விபத்துக்கு அதன் அடித்தளம் காரணமல்ல.  strong Beam - Weak Column - poor quality construction  தான் காரணம்.

ஆறுகளின் குறுக்கே தூண்கள் அமைத்துக் கட்டப்படும் பாலங்கள் பெரும்பாலும் RC well foundation வகையைச் சார்ந்தவை bored insitu pile foundation with pile cap கொண்டும் கட்டப்படுகின்றன.  எங்கள் கட்டுமான பொறியாளர் இதழ் - ஜூலை 2017 இல் காவிரியின் குறுக்கே நாமக்கல் சோழ சிராமணிப் பகுதியில் கட்டப்பட்டுள்ள கதவணைப் பாலம் பற்றி நான் எழுதியுள்ள கட்டுரையைப் படியுங்கள்.  அந்த தொழில்நுட்பம் சிறிது புரியும்.

Q: பில்டர்ஸ் லைன் ஆசிரியர் அவர்கட்கு, பேப்பர் கிரீட், தெர்மா கோல் பிளாக், கான்கிரீட் கான்வாஸ், ஃபிளெக்ஸி கான்கிரீட் எல்லாம் உலகை அசர வைக்கிற புதுக் கண்டுபிடிப்புகள் என்பதை ஒத்துக் கொள்கிறேன்.. ஆனால் நடைமுறைக்க சாத்தியமில்லாத... இந்த தொழிற் நுட்பங்களின் பயன்தான் என்ன? இவை யாவுமே வெற்று தகவல் தாமே...! ஏற்கெனவே இருக்கும் தொழிற் நுட்பங்களை இன்னும் மேம்படுத்துதல் தானே அறிவியல்...? - புவனா, சிவில் பேராசிரியை... சேலம்

ஒரு சிவில் பேராசிரியையாக இருக்கும் தாங்கள் எவ்வாறு இப்படி ஒரு தவறான உண்மையில்லாத  முடிவுக்கு வருகிறீர்கள்? புது கண்டுபிடிப்புகள் அனைத்துமே ஏதோ ஒரு வகையில் ஒரு குறிப்பிட்ட தேவைக்காகக் குறைவாகப் பயன்படுத்தப்பட்டே வருகின்றன என்பதே உண்மை.  

அவை வெறும் வெற்றுத் தகவல்கள் அல்ல.  நமக்கு Geosynthetics- textile RC Concrete  பற்றித் தெரியவில்லை என்றால் அவை உதவாக்கரை என்று ஒதுக்கிவிட முடியாது. ஏனென்றால் கட்டுமானத்துறையில் அவை ஓராயிரம் பயன்பாடுகளாக (Civil Engg Applications) பயன்படவே செய்கின்றன.  

Q: வீரப்பன் அய்யா, தமிழுக்குத் தொண்டாற்றியவர்கள் உண்டு... கட்டடத்துறைக்கு தொண்டாற்றியவர்கள் உண்டு... ஆனால் தமிழுக்கும், கட்டடத்துறைக்கும் ஒரு சேர தொண்டாற்றுபவர் நீங்கள் மட்டும் தான்... முதன் முதலாக பொதுப்பணித்துறையில் பில்லிங் போடும் போது,, அதை தமிழிலேயே எழுதி புரட்சி செய்தவர் நீங்கள் என்பதை என் நண்பர் சொல்லி நான் கேட்டிருக்கிறேன்... அப்படிப்பட்ட நீங்கள் உலகளாவிய புதுப்புது கட்டடவியல் தொழிற் நுட்பங்களையும், கட்டுமான முறைகளையும் எழுதி கட்டுரைகளாக வெளியிட்டால் என் போன்றவர்களுக்கு மிகவும் பயனுள்ளதாக இருக்குமே... - பொறி.சிவராஜன், சேலம்

ஊக்கமளிக்கும் தங்களின் கருத்துரை - மதிப்புரைக்குத் தலை வணங்குகிறேன்.  நீங்கள் விரும்பும் கேட்கும் எதிர்பார்க்கும் என் கட்டுரைகள் பல எங்களின் மாத இதழான கட்டுமானப் பொறியாளரில் தொடர்ந்து வெளியிடப்பட்டு வருகின்றன.  நான் சார்ந்துள்ள பொதுப்பணித்துறை மூத்த பொறியாளர் சங்கப் பரப்புரை வெளியீடுகளாகவும் வந்துள்ளன. kattumaanapporiyalar@gmail.com / transea-pwd@gmail.com எனும் மின்னஞ்சலில் கேட்டுப் படியுங்கள்.  கருத்துரைகளையும் எழுதுங்கள்.