Q: சார். நான் தெரிந்து கொள்வதற்காக கேட்கிறேன்.சென்ற இதழில் பால்கனியில் ஒரு சிறிய தண்ணீர் தொட்டியை (சுமார் 200 லிட்டர் கொள்ளளவு) வைக்கக் கூடாது என விளக்கம் சொல்கிறீர்கள். ஆனால் மும்பையில் வீட்டுக்கு வீடு ஒவ்வொரு பால்கனியிலும் நீச்சல்குளம் வைத்துக் கட்டியிருக்கிறார்களே? அது எப்படி சாத்தியம்? (படத்தை இத்துடன் அனுப்பியுள்ளேன்) - சௌம்யா, பிஇ.சிவில் மூன்றாம் ஆண்டு.

பொறியாளர் செளம்யா அவர்கள். பி இ சிவில் படித்துக் கொண்டே இப்படிப்பட்ட கேள்வியை எப்படி கேட்கிறீர்கள் என்று எனக்குப் புரியவில்லை.என்னுடைய முந்தைய பதிலில் பால்கனிப் பலகம், தண்ணீர்த் தொட்டியைத் தாங்கும் வகையில் வடிவமைக்கப்படவில்லை. எனவே கூடாது என்கிறேன். நீங்கள் அனுப்பியுள்ள வரைபடத்தில் பால்கனி பலகம், தாங்கும் அமைப்புகள் எல்லாம் முறையாக -சரியாக வடிவமைக்கப்பட்டு நீச்சல் குளம் கட்டப்பட்டுள்ளது. எனவே அந்தப் பயன்பாட்டிற்கென வடிவமைத்தால் நீச்சல் குளத்தையும் கட்டலாம்.

Q: நான் ஒரு இளம் பொறியாளன். என் தந்தை கட்டியுள்ள எனது வீடானது 10’ X 10’அளவுள்ள ஐந்து அறைகள் கொண்டதாக உள்ளது. இப்போது அந்த அறையில் பயன்பாட்டிற்கு இடையூறாகவும், கஷ்டமாகவும் இருப்பதால் அதை பெரிய அறைகளாக (10’ X 20’) மாற்றி அமைக்க விரும்புகின்றோம், அதை எப்படி அமைப்பது? என்பதை கொஞ்சம் விளக்கினால் நன்று. - இளங்கோ, திருச்சி

தங்களை ஓர் இளம் பொறியாளன் என்கிறீர்கள். ஆனால், வீட்டு வரைப்படம் அனுப்பாமல் எப்படி அறைகளை மாற்றி அமைப்பது? என்று கேட்டால் எப்படி பதில் சொல்வது என்று எனக்குத் தெரியவில்லை. இருப்பினும் மாதிரி வரைபடத்தில் இதைப்பற்றி எழுதுகிறேன்.

1) உங்கள் கட்டடம், சட்டக் கோப்பு அமைப்பாக இருந்தால் இடையிலுள்ள சுவரை இடித்து விட்டால் 10’ x 20’ அறை பெரியதாகக் கிடைக்கும்.

2) பாரந்தாங்கும் சுவர் அமைப்பு (Load Bearing Structure ) ஆக இருந்தால் அப்படிக் செய்யக் கூடாது. பதிலாக படத்தில் காட்டியுள்ளது போல இடிக்கப் படும் சுவரின் இருபுறமும் பலகை அடித்து எஃகு முட்டுக்கள் கொடுத்து சுவரின் மீது வரும் பாரத்தை மாற்றி விட வேண்டும். அதற்கு பிறகு வரும் பாரம் அளவு, வளையுந்தம் இவற்றிற்கேற்ப ஒரு எஃகு விட்டத்தை ( I Section or RHS) தேர்ந்தெடுத்து சுவரின் மீது சொருக வேண்டும். அந்தக் தாங்கும் இடங்களில் RC Bed Block வைத்திட வேண்டும். திருச்சியுள்ள நல்ல கட்டுமானப் பொறியாளரை அணுகவும். 

Q: அய்யா வீரப்பன் அவர்களே! நீங்கள் பலமுறை அதி நவீன ரசயாணப் பொருட்களைப் பற்றித்தான் சொல்கிறீர்களே தவிர, மண்ணையும், வளத்தையும் பாதுகாக்கும்.., கட்டுமானச் செலவைக் குறைக்கும் வட்டாரக் கட்டடக்கலை பற்றி எந்த விளக்கக் கட்டுரையும், கருத்தையும் எழுதுவதில்லையே ஏன்? - தமிழ்வேலன், மணப்பாறை, ஆசிரியர்

நண்பர் தமிழ்வேலன் அவர்களே. வட்டாரக் கட்டடக்கலை பற்றிதங்களுக்கு எவ்வளவு தூரம் தெரியும் என்று எனக்குத் தெரியவில்லை. Larry Baker எனும் கட்டடக் கலைஞர் விரும்பும் வகை என்றால் அதிகமான பரப்பளவு உள்ள காலிமனை வேண்டும். அப்பகுதியில் கிடைக்கும் பொருட்களைக் கொண்டு கட்டுவதற்கு இன்றைய நவீன கால மனப்பான்மை, வாழ்வுமுறை (குறிப்பாக சென்னை போன்ற பெருநகரமைப்பு) ஒத்துக் கொள்வதில்லை.

பாரம் மிகுதியாக வரும் சட்டக் கோப்புடைய பன்மாடிக் கட்டடங்களை (Apartments Building) வட்டாரக் கட்டடக் கலை முறையில் கட்ட முடியாது. அதை விட உறுதியும் உழைப்பும் RC Buildings  மாதிரி வராது. செலவும் கூடவே  (உரிய Skilled Labor  கிடைக்காமையால்).
எனவே பெரிதும் பயனில்லாத இத்தகைய கட்டடங்களைப் பற்றி நான் எழுதுவது இல்லை. 

Q: அய்யா! நான் சென்னை. திருவெற்றியூரில் என் நண்பன் வீட்டில் ஒரு விசித்திரமான வடிவமைப்பைப் பார்த்தேன். அதாவது 350 லிட்டர் கொள்ளளவு உடைய ஒரு தண்ணீர் தொட்டியை அவர்கள் வீட்டின் பால்கனியிலேயே ஒரு ஓரமாக கட்டியிருக்கிறார்கள்.(படத்தில் உள்ளது போல் அல்ல.,) ‘அதற்கு பதிலாக ஒரு பிளாஸ்டிக் பேரலை வைக்கலாமே, பால்கனியில் தண்ணீர் தொட்டியை கட்டுவது ஆபத்தாயிற்றே?’ எனச் சொன்னேன். அதற்கு அவனோ ‘மூன்று பக்கம் ஏற்கெனவே சுவர் இருக்கிறது. நாங்கள் ஒரு பக்கம் ( நான்காவது பக்கம்) கண்டி கற்களால் மெல்லிய சுவரை எழுப்பி தொட்டியாக்கி விட்டோம். இது மிகவும் மலிவானது’ என்கிறான். மேலும், இதற்கு ஈடாக 2 பேரல்களின் இடத்தை விட இந்த பால்கனி தொட்டியின் இடப்பரப்பு சிறியது என்று காரணம் கூறுகிறான். இது சரியானதா? - சதீஷ், மோட்டார் மெக்கானிக், அயன்புரம்

வீட்டின் பால்கனியில் தண்ணீர் தொட்டியைக் கண்டிப்பாகக் கட்டக்கூடாது. அது பால்கனி காங்கிரீட் கூரைப்பலகத்தின் கீழ் நீர்க்கசிவு ஏற்பட ஏதுவாகும். மேலும் பிளாஸ்டிக் பேரலையும் பால்கனியில் வைக்கக் கூடாது. அந்த தண்ணீர்த் தொட்டியின் பாரத்தைத் தாங்கும் வகையில் அந்தப் பால்கனிப் பலகம் வடிவமைக்கப்படவில்லை. 

சிக்கனம் என்ற பெயரில் இத்தகைய செயல்களைக் கண்டிப்பாகச் செய்யக்கூடாது என்பது என்  எச்சரிக்கை.

Q: ஐயா, நானும் பொதுப்பணித் துறையில் பணியாற்றுகிற ஒரு பொறி யாளன்தான். உங்களிடம் எனது கேள்விகள் இரண்டு. 1. உங்கள் ஒட்டுமொத்த தநாபொபது வாழ்நாள் பணி யில் ஆட்சியாளர்களின் தொந்தரவு இருந்ததா? அல்லது சுதந்திரமாக செயல் பட்டு மனநிறைவோடு பணிக் காலத்தை முடித்தீர்களா? 2. “வீரப்பன் பணி ஓய்வுக்கு முன்‘, “பணி ஓய்வுக்கு பின்‘ இந்த இரண்டில் எது உங்களுக்கு மிகவும் பிடித்தமானதாக இருக்கிறது? -பொறி, ஞானமலர்

தமிழ்நாடு பொதுப்பணித்துறையில் பணியாற்றயி போது ஆட்சியாளர்களின் குறுக்கீடு அவ்வப்போது இருக்கவே செய்தது. நான் எல்லா வகையிலும் நேர்மையாகவும், பொறுப்போடு திறமை யாகப் பணியாற்றியதால் என்னிடம் அரசிய லாளர் தொல்லை தரவில்லை. எனவே, சரியாக செயல்பட்டு மனநிறைவோடு ஓய்வு பெற்றேன்.இந்தத் திருப்தி இன்றும் எனக்குண்டு.

பணி ஓய்விற்கு முன் நேரிடையாகச் செயற்பாட்டில் மேலாண்மையோடு திறமை யாகவும், சிறப்பாகவும் செயற்பட்டமையால் - அது மிகவும் பிடித்தமானதாக இருந்தது. பணி ஓய்விற்குப் பின் நிறைவேற்ற வேண்டிய பணிகளில் நான் நினைப்பது போல இன்றுள்ள பொறியாளர்கள் பல்வேறு காரணங்களினால் செய்வதில்லை. 

எனவே, பணி ஓய்விற்குப் பின்னர் பல சமயங்களில் சோர்வு ஏற்படவே செய்கிறது. எனினும் விடாது சொல்லிக் கொண்டுதான் இருக்கிறேன்.