Q: நாங்கள் கட்டும் வீட்டிற்கு படிகட்டுகளுக்கு சிமென்ட் காரையிலான கைப்பிடிச் சுவர் வைக்க விரும்பு கிறோம். அது வீட்டின் வெளியிலிருந்து மொட்டை மாடிக்குச் செல்லும் படிக்கட்டு வழியாகும். ஆனால், நமது கண்ட்ராக்டர் கிரில் கம்பிகளை வைக்க சொல்கிறார். எதை நான் தேர்வு செய்வது? ஏன்? - ஆறுமுகச்சாமி. ஹோட்டல் ஊழியர், ராஜபாளையம்,

Answer:

நீங்கள் கட்டும் வீட்டுப் படிக்கட்டுகளுக்கு சிமெண்ட் காரையினாலான கைப்பிடிச்சுவர் வைக்கக் கூடாது. இந்த கைப்பிடிச் சுவரில் வலிமையும் இல்லை; உறுதியும் இல்லை. காலப்போக்கில் விரிசல்கள் விழுந்து உடைந்து போக வாய்ப்புண்டு. எனவே உங்களின் ஒப்பந்தகாரர் சொல்வதைப் போல மெல்லெஃகு கிரில் கம்பிகளை வைத்து கட்டுங்கள். வலிமையுடனும் உறுதியுடனும் நீண்ட காலத்திற்கு உழைக்கும்.

Q: அய்யா! என் வீடு 5 ஆண்டுகளுக்கு முன் கட்டப்பட்டது. ஆர்.சி.சி கட்டமைப்பு தான். 800 ச. அடி வீடு அது. G+ 1 கட்டுமானம் அது. சுற்றிலும் 2 மீட்டரும் பின் பகுதி மட்டும் அரை மீ இடைவெளி விட்டு கட்டினோம். அப்போது பின்மனை காலி மனையாக இருந்தது. பின் பக்கம் பில்லர் அமைக்கும் போது ஒரு மீ நீளத்தில் கம்பி நீட்டிக்கப்பட்டு அப்படியே விடப்பட்டது. இப்போது வெளியே நீட்டிக் கொண்டிருக்கும் கம்பியை பின் மனையின் சொந்தக்காரர் வெட்டி எடுக்க சொல்கிறார். (அவர்கள் வீடு கட்ட ஆயத்தமாக உள்ளனர்) இதை நாங்களே ராட் கட்டர் வைத்து வெட்டி விடலாமா? அல்லது கம்பியை வர்ணம் தீட்டி, மடக்கி வைத்து காபந்து செய்ய வேண்டுமா? இது போல் ஏன் கம்பிகளை நீட்டி விடுகிறார்கள். எல்லா கட்டுமானங்களிலும் இது போல் தான் செய்வார்களா? - திரு. தினகரன், ஓய்வு பெற்ற தபால் ஊழியர், மணவாளன் நகர் , திருவள்ளூர்

Answer:

சட்டக்கோப்பு கட்டடங்களில் தூண்களிலும் விட்டங்களிலும் Development Length வேண்டும் என்பதற்காக எஃகு உறுதியூட்டிகளை 1 மீட்டர் நீளத்திற்கு / உயரத்திற்கு நீட்டி விடுவார்கள். இது ஒரு பழைய கால தொழில்நுட்ப முறை. நீங்கள் தூண்களிலிருந்து நீட்டிக் கொண்டுள்ள உறுதியூட்டிகளை உங்கள் பகுதியில் வளைத்து அதன் மீது துரு எதிர்ப்பு வேதியியல் சேர்மானத்தை பூசி விடலாம் அல்லது 1/2 அடி உயரத்திற்கு கம்பியை விட்டு மீதி கம்பிகளை வெட்டி விடலாம்.

நீங்கள் மேலே கட்டடம் கட்டும்போது மேலிருந்து வரும் புதிய கம்பிகளை 1/2 அடி உயரத்திற்குள்ள பழைய கம்பிகளோடு பற்றவைப்பு (Fillet Welding) மூலம் ஒட்டிவிடலாம். இது புதிய முறை. செலவும் அதிகமாகாது. கம்பிகளும் துருப்பிடித்து இற்றுப் போகாது. நீங்கள் இதில் ஏதாவது ஒரு முறையை முயன்று பார்க்கலாம்.

Q: முன்பெல்லாம் காங்கிரீட் கட்டுமான உறுப்புகளுக்கு (பலகம், விட்டம், தூண், அடித்தளம் போன்றவைகட்கு) 1:2:4 அல்லது 1:1.5:3 விகித காங்கிரீட்டையே பயன்படுத்திக் கட்டினோம். ஆனால், சில வடிவமைப்புப் பொறியாளர்கள் குறிப்பாக சென்னையில் கட்டப்படும் கட்டடங்களுக்கு ஆர்எம்சி M25 Grade / M30 Grade காங்கிரீட்டைப் பயன்படுத்தச் சொல்லி வடிவமைத்து வற்புறுத்துகிறார்கள். இது ஏன் இப்படி ? 1:2:4/1:1.5:3 விகித காங்கிரீட்டுக்குப் பதிலாக M25/ M30 தரக்காங்கிரீட்டைப் பயன்படுத்துவதால் கட்டுமானச் செலவு கூடத்தானே செய்யும். இதை எப்படிச் சரிக்கட்டுவது?

Answer:

பதில்: கடந்த நூறு ஆண்டுகளுக்கு மேலாக (2000 ஆண்டிற்கு முன்பு ) மட்டுமானத்துறியில் கொள்ளளவு முறையில் 1:2:4/1:1.5:3 விகிதக் காங்கிரீட்டையே வலிமை தாங்குதிறனுக்காக மட்டுமே பயன்படுத்தி வந்தோம். 

 

அப்போது அந்தக் கட்டுமானம் எந்தப் பகுதியில் எத்தகைய சூழலில் (கடற்கரையோரமா / தொழிலகக் கட்டடங்களா / அனல் மின்சார / அனுமின்சார கட்டமைப்பா) என்றெல்லாம் கருதாமல் கட்டி வந்தோம். அனுபவத்தில் கடற்கரையோரக் கட்டடங்கள் / அனல் மின் நிலையங்கள் குறைந்த காலத்திலேயே (60/100 ஆண்டுகளுக்கு பதிலாக 5/10 ஆண்டுகளிலேயே) பழுதடைந்தன. குறிப்பாக காங்கிரீட் உறுப்புகளின் மேலுறை விரிவடைந்து விரிசல்களும் உள்ளிருக்கும் உறுதியூட்டிக் கம்பிகள் குறிப்பாக CTD   எனப்படும் குளிர்முறுக்குக் கம்பிகள் துருபிடித்து வலிமை இழந்தன. மேலும் காங்கிரீட் உறுப்புகளில் பாரத்தைச் சுமத்தும்போது ஏற்படும் வளைவிறக்கம் (Deflection) மற்றும் விரிசல்களின் அளவு பற்றி முன்பெல்லாம் விரிவாகக் கணக்கிட்டு அமைப்பதில்லை.

 

கட்டடங்கள் பாதுகாப்புடன் வலிமையுடன் (Strength & Safety) மட்டும் இருந்தால் போதாது. அவை அமைந்திருக்கும் இடச் சூழலுக்கேற்ப - தாக்கப்படும் கடற்காற்று/ வேதிப்பொருள்கள் கலந்த வாயுக்கள், இன்றியமையாதது  இவற்றிற்கேற்ப - வலிமையோடு கூட நீடித்துழைக்கும் உறுதியையும் (Durability) கணக்கில் எடுத்துக் கொண்டு கட்டடங்கள் வடிவமைக்கப்படவேண்டும், சரியாகக் கட்டப்பட வேண்டும் என்பதைல் கட்டுமான ஆராய்ச்சியாளர்கள் / வல்லுநர்கள் வலியுறுத்தினார்கள். 

 

அதன் அடிப்படையில் சுற்றுச்சுழலைக் (Exposure Condition) கணக்கில் கொண்டு - Mild, Moderate, Severe, Very Severe, Extrreme  எனப் பாகுபடுத்தி அதற்கேற்ப எடையளவு முறையில் வடிவமைக்கப்பட்டு தயாரிக்கப்பட்ட உறுதிபெறு கான்கிரீட் M20 / M25 / M30 / M35 / மற்றும் M40 தரத்தில் பயன்படுத்த வேண்டும் என்பதை IS:456-2000 Code of Practise for Plain & Reinforced Concrete  (Foruth Revision) என்ற தரக் கையேடு மூலம் விளக்கி அதற்குரிய வழிமுறைகளை (அனுமதிக்கப்படும் விரிசல் அகலம், கீழிறக்கம், மேலுறைக்கனம் தீத்தடுப்புத்தன்மை போன்றவைகளை) தெளிவாகத் தெரிவித்திருக்கிறது. அதனடிப்படையில் NBC - 2009 (National Building Code - 2009) 1:1.5:3 காங்கிரீட்டுகள் குறிப்பிடும் தேவையான வலிமையை உறுதியைத் தருவதில்லை. மாற்றாக M20/ M25/ M30 முதலிய தரக் காங்கிரீட்டுகள் தேவைப்படும் வலிமையைத் தருகின்றன. 

 

எனவே, தான் நாம் எடையளவுடைய (RMC உட்பட) M20, M25, M30 தரக்காங்கிரீட்டுகளைப் பயன்படுத்த முன்வர வேண்டும். சென்னை மாநகர் Severe Exposure Condition இல் இருப்பதால் னி30 காங்கிரீட் தேவைப்படுகிறது. எடையளவு காங்கிரீட்டில் Super Plasticizer Admixture கலக்கும் போது தேவைப்படும் சிமெண்ட்டின் அளவு (300 கிலோ முதல் 350 கிலோ மட்டுமே) குறைகிறது. எனவே, 1:1.5:3 கொள்ளளவு காங்கிரீட்டின் விலையை விட M25 தர எடையளவு காங்கிரீட்டின் விலை...6 முதல் 8% வரை குறைவே.

 

Q: நீங்கள் உள்பட பல மூத்த பொறியாளர் களும் சிவில் பயிலும் மாணவர்கள் கூடுதல் திறனை படிக்கும் காலத்தில் வளர்த்து கொள்ள வேண்டும் என அறிவுரை கூறுகிறீர்கள்.. நல்லது தான்.. ஆனால். எங்களைப் போன்ற கிராமப்புறங்களில் பயிலும் மாணவர்கள் ஏழ்மையில்.., பணவசதி இன்றி இருக்கிறோம். அது மட்டுமல்ல முதல் தலைமுறை பொறியியல் மாணவர்களான எங்களுக்கு வீட்டில் சரியான வழிகாட்டுதல் இல்லாததால், எங்களின் பாட திட்டம் படிப்பதற்கே நேரம் இல்லை.., கிரகித்து கொள்ளும் திறன் இல்லை.. இதில் பாட திட்டத்தை தாண்டி படியுங்கள் என்றால் அதற்கான நேரம், பண வசதி...எங்களுக்கு எங்கே இருக்கிறது? உங்கள் கால கட்டத்தில் இது போன்ற நடைமுறை சிரமங்களை தாண்டி எப்படி சிறப்பாக பொறியியல் பட்டம் பெற்றீர்கள்? அறிய ஆவலாக இருக்கிறது.. - இம்மானுவேல், காரைக்குடி, சிவில் 4 ஆம் ஆண்டு.

Answer:

நாங்கள் சிவில் பயிலும் 1960-1970ல் ஆண்டுகளிலும் எங்களுக்கும் இத்தகைய சங்கடங்களும் சிக்கல்களும் இருக்கவே செய்தன. ஆனால் நாங்கள் படித்த கல்லூரி எல்லா வசதிகளையும் கொண்டது. 

 

பேராசிரியர் பெருமக்கள் மிக அக்கறைக் கொண்டு மிகத் தெளிவான பொறியியல் கல்வியை எங்களுக்கு அளித்தனர்.

 

எங்களை அக்கறையோடு அணுகி கற்பித்த பேராசிரியர்களும் இப்போது இல்லை.  எனவே, நிலைமை மோசமாக இருக்கிறது என்பது உண்மைதான்.

Q: சர்.விஸ்வேஸ்வராயா.., லாரி பெக்கர், பென்னி குக் மூவருக்கும் உள்ள ஒற்றுமை மற்றும் வேறுபாடுகள் என்னவென கூற முடியுமா? - ஆர். மதிவாணன், ஆசிரியர் மணப்பாறை..

Answer:

அன்புள்ள ஆசிரியர் மதிவாணன் அவர்களே, பட்டிமன்றம் நடத்தி இவர்களின் சாதனைகளைப் பட்டியலிட முடியாது. 

 

சர். விஸ்வேசுவராயா ஒரு மாபெரும் பொஷீயாளர்; சிறந்த ஆட்சியாளர். நாட்டின் தேவையுணர்ந்த தேசியத் தலைவர். வாழ்நாளில் மாபெரும் சாதனைகள் செய்தவர். அவரோடு லாரி பேக்கரை எப்படி ஒப்பிடுவது என்று தெரியவில்லை.  லாரி பேக்கர் தற்சார்பு கட்டடக்கலையை வலியுறுத்தியவர்.  

அவர் ஒரு கிராமிய கட்டடக் கலைஞர் மட்டுமே. 

பென்னி குக் ஓர் சமுதாய சிந்தனை மிக்க ஆங்கிலேயப் பொறியாளர். இவர்கள் மூவரையும் ஒப்பிட முடியாது, ஒவ்வொருவரும் தங்கள் துறைகளில் பணிகளில் மேம்பட்டவர்கள்.