Q: சார் ! நாங்கள் ஜி+2 கட்டுமானம் ஒன்றை மேற்கொள்ள இருக்கிறோம். சந்தையில் சிடிடிரீ-பார்கள், டிஎம்டி பார்கள் இருப்பதாக சொல்கிறார்கள்.நாங்கள் எதைப் பயன்படுத்த வேண்டும்? ஏன்? - ஸ்டானிஸ்லைஸ் டேனியல் , அம்பத்தூர்.

Answer:

சந்தையில் கிடைக்கும் குளிர் முறுக்குக் கம்பிகள் (Cold Twisted Deformed bars - CTD) காங்கிரீட் உறுப்புகளில் பயன்படுத்துவதை முற்றிலும் தவிர்த்திட வேண்டும்.

ஏனென்றால், CTD கம்பிகளைப் பயன்படுத்திய காங்கிரீட் உறுப்புகளில் - (பலகம், விட்டம் மற்றும் தூண்கள்) விரைவில் (5 ஆண்டுகளுக்குள்ளே) துருப்பிடித்து இவ்வுறுப்புகளை வலுவிழக்கச் செய்கின்றன. குளிர் முறுக்கலின் போது வெளிப்புற புடைப்புகளில் (outer surface ribs) நுண்ணிய விரிசல்கள் ஏற்பட்டு காற்றிலுள்ள மற்றும் தண்ணீரிலுள்ள உயிர் வளியை (Oxygen) உறிஞ்சி துரு பிடிப்பு நிகழ்கிறது.

எனவே தான், CTD உறுதியூட்டிக் கம்பிகளைப் பயன்படுத்தக்கூடாது. 

மாறாக TMT (Thermo Mechanically Treated)  உறுதியூட்டிகளின் மேற்பரப்பில் due to Quenching process) நுண்ணிய விரிசல்களும் -அதன் காராணமாகத் துருப்பிடித்தலும் நடப்பதில்லை.

எனவே TMT  கம்பிகளைப் பயன்படுத்துவதே பாதுகாப்பானது. 

 

Q: சார். இதுநாள் வரை செப்டிக் டேங்க் என்றால் அதன் பாகமும் (கீழ்பகுதி உட்பட) சரியாக மூடப்பட்டிருக்க வேண்டும். அப்போது தான் அசுத்தமான நீர் நிலத்தடி நீருடன் கலக்காது என நினைத்திருந்தேன். சென்ற இதழில் செப்டிக் தொட்டியின் கீழ்பாகத்தை அப்படியே விட்டு விட வேண்டும் என ஈரோடு சேர்ந்த பொறியாளர் ஹரி கூறுகிறார். எது சரியானது அய்யா? - டேவிட், திருநின்றவூர்

Answer:

திரு.டேவிட் அவர்களே, உங்களுடைய தகவல்களுக்காக Septic Tank -யையும், Soak Pit  யையும் இணைந்த ஒரு வரை படத்தை இணைத்துள்ளேன். பொதுவாகவே Septic Tank ல் அடிப்பகுதியில் Concrete போடப்பட்டு நன்றாக மூடப்பட்டிருக்கும்.

அதில் விழும் கழிவு நீரும், கழிவுகளும் அந்த அறையில் தங்கிக் கொள்ளும். வெறும் கழிவு நீர் மட்டும் அருகிலுள்ள Soak Pit உறிஞ்சு குழிக்குள் போய் அதில் போடப்பட்டுள்ள செங்கல், சல்லி இவற்றால் உறொஞ்சப்பட்டு விடும். அதிகமாக கழிவு நீர் இருந்தால் தனியாக அதை பம்பின் மூலம் வெளியே எடுத்துவிடுவார்கள்.

Septic Tank ன் அடிப்பாகத்தில் Concrete போடாமல் அப்படியே விட்டுவிடுவது சரியல்ல. பக்கத்திலிருக்கும் நிலத்தடி நீர் மாசுபட வாய்ப்புண்டு. ஈரோடு  பொறியாளர் ஹரி அவர்களின் கருத்து சரியானதல்ல .  

Q: சமீபத்தில் ஒரு கேள்விக்கு பதிலளித்த நீங்கள். மர பேனல்களால் வெளிப்புறச் சுவர்களை கவர் செய்தால் கட்டடத்திற்குள் வெப்பம் வராது என சொல்கிறீர்கள். இதே எனது இன்னொரு கேள்விக்கு (1 ஆண்டுக்கு முன் கேட்ட கேள்வி) அதாவது வெளிப்புறச் சுவற்றில் வெர்டிபைடு டைல் (சிறிய டைல்கள்) பதிப்பது சரியா? எனகேட்ட போது, அப்படி செய்தால் சுவரின் விரிசல், வெடிப்பு, பலமின்மை வெளியில் தெரியாது. எனவே அதைத் தவிர்க்க வேண்டும் என்றீர்கள். வெளிப்புற மேற்பரப்பை கவர் செய்யலாமா? வேண்டாமா? இரண்டில் எது சரி ? - ம. நாகராசன், ஆவடி, பிரேக்ஸ் இந்தியா

Answer:

அன்பு நண்பர் திரு. நாகராஜன் அவர்களே, உங்கள் கேள்வி தெளிவாக இல்லை; சரியாகவும் பொருந்தவில்லை, ஒன்று மரச் சட்டங்களால் வீட்டிற்குள் வெப்பம் அதிகம் வராது. இது சரியானது தான். அடுத்தது வெளிப்புறச் சுவர்களில் குறிப்பாக Balcony பகுதியில் Vitrified Tiles பதித்தால் சுவரின் விரிசல் வெடிப்பு வெளியே தெரியாது. சுவருக்கு வலிமையும், பாதுகாப்பும் தரும். இதுவும் சரிதான்.

 

 இந்த கேள்விக்கும் முன்னால் சொன்னதற்கும் எந்தத் தொடர்பும் இல்லை. மொட்டைத் தலைக்கும், முழங்காலுக்கும் முடிச்சுப் போடாதீர்கள்.

Q: சார் ! நான் 28க்கு 16அடி மனையில் சுற்றுச்சுவர் அமைக்க உள்ளேன். இதுவரை வெறும் கம்பிவேலிதான் இருந்தது. அதை அகற்றி பிரிகேஸ்ட் சுவர் அமைக்க உள்ளேன். ஆனால் ,என் மேஸ்திரி செங்கல்லினால் ஆன காம்பவுண்ட் அமைக்க வற்புறுத்துகிறார். தாங்கள் எதை எனக்கு அறிவுறுத்துகிறீர்கள்? - மே. வசந்த, அட்வகேட், மதுரை

Answer:

உங்களுடைய  சிறிய மனைக்கு Precast Concrete பலகங்கள் கொண்ட சுற்றுச்சுவர் அமைப்பதே சரி. செலவும் குறையும்; விரைவாக நடக்கும். எனவே உங்கள் மேஸ்திரி சொல்வதைப்போல செங்கல்லினால் சுற்றுச்சுவர் அமைக்காதீர்கள். 

 

தனியாக குடியிருப்பு வீடுகள் கட்டும்போது உரிமையாளர்கள் பலரும் சுற்றுச் சுவர் கட்ட- செலவு குறைந்த சிக்கனமானவற்றையே தேர்ந்தெடுக்க விரும்புகின்றனர். இந்தச் சுற்றுச் சுவர்வேலை குடியிருப்பு கட்டுமானத்தில் கடைசிவேலை. அதற்குள் ஆன கட்டட செலவு மதிப்பீட்டுச் செலவை விட மிகவும் எகிறியிருக்கும். குறிப்பாக சமையலறை - மின் சாதனங்கள் - உள் அலங்கார வண்ணப்பூச்சுகள் மற்றும் வரவேற்பறை மரவேலைகள்- மதிப்பீட்டுச் செலவைவிட இரண்டு / மூன்று மடங்கு கூடுதலாக ஆகியிருக்கும். எனவே கையில் இருப்பதை வைத்துச் சுற்றுச் சுவரைக் கட்ட வேண்டியிருக்கும்.

 

அவர்கட்கு எங்களுடைய மாற்று வடிவமைப்புகள்

 

1. அடிமனை மண் களிமண்ணாக இருந்தால் 200 மிமீ (8”) விட்டமுடைய 2.40 மீட்டர் / 2.10 மீட்டர் ஆழமுடைய அடிபெருத்த குத்துத் தூண் (Single Under Reamed Pile) அடித்தளம் - 3.60 மிமீ - 4.50 மீ இடைவெளியில் போட்டு பிணைப்பு விட்டம் (Grade Beam at Ground Level) கொண்டு இணைக்க வேண்டும். அதற்கு மேலே 1650 மிமீ / 1800 மிமீ (5’ 6” to 6’ 0”) 

 

உயரத்திற்கு 100 மிமீ (4”) கனமுடைய முன்வார்த்த கெட்டிக் காங்கிரீட் 400 x 200 x 100 மிமீ கட்டுகளைக் (Precast solid concrete block masony in cm 1:4 in between RC Columns Placed at  4.5 m c/c) கொண்டு சுவர் எழுப்பலாம். இதற்குபூச்சு வேலை (Plastering) தேவையில்லை. இடைக்கோடு அடித்தாலே போதுமானது.

 

2. அடிமனை மண் கெட்டித் தரையாக (Hard Strata) இருந்தால் முன்வார்த்த காங்கிரீட் தூண்கள் 6’0” இடை வெளியில் நிறுத்தி இரண்டடி ஆழம் அடித்தளம் (Isolated Footing 450 x 450 x 150 mm) தரைக்கு மேலுள்ள 5’6’ /6”0”  உயரத்தை 25 மிமீ கனமுடைய ஒவ்வொன்றும் 300 மிமீ உயரமுடைய முன்வார்த்த காங்கிரீட் பலகங்களை இருதூண்களுக்கு இடையே சொருகி பொருத்தி அமைக்கலாம். இதற்குக் குறைந்தது னி10 தரக் காங்கிரீட்டையோ M 15 தரக் காங்கிரீட்டையோ பயன்படுத்திட முன்னமே வார்ப்பாளரைக் கேட்டுக் கொண்டு அதற்குரிய விலையைக் கொடுக்க வேண்டும். 

 

இல்லாவிடின், M 5 / M 7.5 தரக் காங்கிரீட்டைப் பயன்படுத்துவர். அவை வலிமையாக உறுதியாக இருக்காது. பிரிகேஸ்ட் சுவர்பாதுகாப்பானதாக இருக்கும். செலவு மிக மிகக் குறைவு. மொத்தச் சுற்றுச் சுவரையும் (60’ x 40’ ) 2 அல்லது 3 நாட்களில் நிறுத்திக் கட்டிவிடுவார்கள். தயக்கமின்றிப் பயன்படுத்தலாம்.

Q: தீப்பிடிக்காத மாடுலர் கிச்சன் அமைத்துத் தருகிறோம் என ஒரு விளம்பரம் பார்த்தேன். உண்மையில் அப்படி ஒரு மாடுலர் கிச்சன் இருக்கிறதா? சிறிய அளவிலான உணவு விடுதி அமைக்க இருக்கும் எனக்கு அதுபற்றி தகவல் தாருங்கள். (எனது பட்ஜெட் 3 லட்ச ரூபாய்) - சிவா . நாகை

Answer:

 Modular Kitchen என்ற வீட்டுப்பகுதி தீயை எதிர்க்கும் பிளைவுட் கொண்டு கட்டப்படுகிறது. இந்த Plywood -ல் பல வேதியியல் சேர்மானங்கள் சேர்க்கப்பட்டு தீ தடுப்பு சக்தி மிகுதியாக்கப்படுகிறது. வெப்பத்திலிருந்தும் இது பாதுகாக்கப்படுகிறது.

 

இதனுடைய செலவு அளவிற்கேற்ப ,செய்யப்படும் வடிமைப்புக்கேற்ப மாறுபடும். வசதிக்கேற்ப இதை செய்து தரும் கட்டுநர்கள்  இருக்கிறார்கள் அவர்களை அணுகவும்.