Q: சார் ! நான் 28க்கு 16அடி மனையில் சுற்றுச்சுவர் அமைக்க உள்ளேன். இதுவரை வெறும் கம்பிவேலிதான் இருந்தது. அதை அகற்றி பிரிகேஸ்ட் சுவர் அமைக்க உள்ளேன். ஆனால் ,என் மேஸ்திரி செங்கல்லினால் ஆன காம்பவுண்ட் அமைக்க வற்புறுத்துகிறார். தாங்கள் எதை எனக்கு அறிவுறுத்துகிறீர்கள்? - மே. வசந்த, அட்வகேட், மதுரை

Answer:

உங்களுடைய  சிறிய மனைக்கு Precast Concrete பலகங்கள் கொண்ட சுற்றுச்சுவர் அமைப்பதே சரி. செலவும் குறையும்; விரைவாக நடக்கும். எனவே உங்கள் மேஸ்திரி சொல்வதைப்போல செங்கல்லினால் சுற்றுச்சுவர் அமைக்காதீர்கள். 

 

தனியாக குடியிருப்பு வீடுகள் கட்டும்போது உரிமையாளர்கள் பலரும் சுற்றுச் சுவர் கட்ட- செலவு குறைந்த சிக்கனமானவற்றையே தேர்ந்தெடுக்க விரும்புகின்றனர். இந்தச் சுற்றுச் சுவர்வேலை குடியிருப்பு கட்டுமானத்தில் கடைசிவேலை. அதற்குள் ஆன கட்டட செலவு மதிப்பீட்டுச் செலவை விட மிகவும் எகிறியிருக்கும். குறிப்பாக சமையலறை - மின் சாதனங்கள் - உள் அலங்கார வண்ணப்பூச்சுகள் மற்றும் வரவேற்பறை மரவேலைகள்- மதிப்பீட்டுச் செலவைவிட இரண்டு / மூன்று மடங்கு கூடுதலாக ஆகியிருக்கும். எனவே கையில் இருப்பதை வைத்துச் சுற்றுச் சுவரைக் கட்ட வேண்டியிருக்கும்.

 

அவர்கட்கு எங்களுடைய மாற்று வடிவமைப்புகள்

 

1. அடிமனை மண் களிமண்ணாக இருந்தால் 200 மிமீ (8”) விட்டமுடைய 2.40 மீட்டர் / 2.10 மீட்டர் ஆழமுடைய அடிபெருத்த குத்துத் தூண் (Single Under Reamed Pile) அடித்தளம் - 3.60 மிமீ - 4.50 மீ இடைவெளியில் போட்டு பிணைப்பு விட்டம் (Grade Beam at Ground Level) கொண்டு இணைக்க வேண்டும். அதற்கு மேலே 1650 மிமீ / 1800 மிமீ (5’ 6” to 6’ 0”) 

 

உயரத்திற்கு 100 மிமீ (4”) கனமுடைய முன்வார்த்த கெட்டிக் காங்கிரீட் 400 x 200 x 100 மிமீ கட்டுகளைக் (Precast solid concrete block masony in cm 1:4 in between RC Columns Placed at  4.5 m c/c) கொண்டு சுவர் எழுப்பலாம். இதற்குபூச்சு வேலை (Plastering) தேவையில்லை. இடைக்கோடு அடித்தாலே போதுமானது.

 

2. அடிமனை மண் கெட்டித் தரையாக (Hard Strata) இருந்தால் முன்வார்த்த காங்கிரீட் தூண்கள் 6’0” இடை வெளியில் நிறுத்தி இரண்டடி ஆழம் அடித்தளம் (Isolated Footing 450 x 450 x 150 mm) தரைக்கு மேலுள்ள 5’6’ /6”0”  உயரத்தை 25 மிமீ கனமுடைய ஒவ்வொன்றும் 300 மிமீ உயரமுடைய முன்வார்த்த காங்கிரீட் பலகங்களை இருதூண்களுக்கு இடையே சொருகி பொருத்தி அமைக்கலாம். இதற்குக் குறைந்தது னி10 தரக் காங்கிரீட்டையோ M 15 தரக் காங்கிரீட்டையோ பயன்படுத்திட முன்னமே வார்ப்பாளரைக் கேட்டுக் கொண்டு அதற்குரிய விலையைக் கொடுக்க வேண்டும். 

 

இல்லாவிடின், M 5 / M 7.5 தரக் காங்கிரீட்டைப் பயன்படுத்துவர். அவை வலிமையாக உறுதியாக இருக்காது. பிரிகேஸ்ட் சுவர்பாதுகாப்பானதாக இருக்கும். செலவு மிக மிகக் குறைவு. மொத்தச் சுற்றுச் சுவரையும் (60’ x 40’ ) 2 அல்லது 3 நாட்களில் நிறுத்திக் கட்டிவிடுவார்கள். தயக்கமின்றிப் பயன்படுத்தலாம்.

Q: தீப்பிடிக்காத மாடுலர் கிச்சன் அமைத்துத் தருகிறோம் என ஒரு விளம்பரம் பார்த்தேன். உண்மையில் அப்படி ஒரு மாடுலர் கிச்சன் இருக்கிறதா? சிறிய அளவிலான உணவு விடுதி அமைக்க இருக்கும் எனக்கு அதுபற்றி தகவல் தாருங்கள். (எனது பட்ஜெட் 3 லட்ச ரூபாய்) - சிவா . நாகை

Answer:

 Modular Kitchen என்ற வீட்டுப்பகுதி தீயை எதிர்க்கும் பிளைவுட் கொண்டு கட்டப்படுகிறது. இந்த Plywood -ல் பல வேதியியல் சேர்மானங்கள் சேர்க்கப்பட்டு தீ தடுப்பு சக்தி மிகுதியாக்கப்படுகிறது. வெப்பத்திலிருந்தும் இது பாதுகாக்கப்படுகிறது.

 

இதனுடைய செலவு அளவிற்கேற்ப ,செய்யப்படும் வடிமைப்புக்கேற்ப மாறுபடும். வசதிக்கேற்ப இதை செய்து தரும் கட்டுநர்கள்  இருக்கிறார்கள் அவர்களை அணுகவும். 

Q: அன்பு அய்யா வீரப்பன் அவர்கட்கு.. நான் வீடு கட்ட உள்ளேன். எங்கள் ஊரில் தண்ணீர் தட்டுப்பாடு மணல், சிமெண்ட் விலை அதிகம் என்பதால் Interlock Brick ல் வீடு கட்ட உள்ளேன். Interlock Brick ல் வீடு கட்டலாமா? இதனுடைய நன்மைகள் தீமைகள் பற்றிய தகவல்கள் தேவை. செங்கல் கட்டுமானத்திற்கும் Interlocking Brick க்கிற்கும் உள்ள வேறுபாடு பற்றி தகவல் தரவும். -மகேந்திரன், சேலம்.

Answer:

இண்டர்லாக்கிங் செங்கற்கள் (Interlock Brick) கொண்டு வீடு கட்டும் போது சிமெண்ட் கலவை தேவைப்படாது. இண்டர்லாக்கிங் சுவருக்குத் தேவையான வலிமையை (உறுதியை) தருகின்றன. இந்த வகையான கட்டுமானங்கள் கேரளாவில் பெரிதும் வரவேற்கப் படுகின்றன. இண்டர்லாக்கிங் செங்கற்கள் சுடப்படுவதில்லை.

 

Pressing Machine கொண்டு அமுக்கப்பட்டு இயற்கையாக வெயிலில் காய வைக்கப்படுகின்றன. சில வேதியியல் சேர்மங்கள் இணைப்பு வலிமையை அதிகப்படுத்துவதற்காகச் சேர்க்கப் படுகின்றன.

 

இந்த செங்கல்கள் அளவில்  பெரியவை 10” x 8” x  4” இவற்றினுடைய எடை சுடப்பட்ட செங்கல்லுக்கு இணையாக இருக்கும். இதைப்பற்றி மேலும் அறிய இணைய தளத்தில் தேடுக.

Q: அடித்தளத்திற்கு ஆலோசனை சார் நாங்கள் பூந்தமல்லிக்கு அருகே மனை வாங்கியுள்ளோம். அதில் பேப்பர் & பாட்டில் கிடங்கு அமைக்க உள்ளோம் கீழே கிடங்கு, மேலே (2000 + 2000 சதுர அடி) என திட்டமிட்டிருகிறோம். இந்த நிலத்தில் சுமார் அடிமனை மண் 6 அடி வரை களி மண் நிரம்பி இருக்கிறது. அதன் கீழே மிக நுண்ணிய மண் 15’ அடி வரை இருப்பதாக கூறுகிறார்கள். தரை தளம் கிடங்கு என்பதால் சாலை மட்டத்திலிருந்து 3 அடியாவது உயர்த்த வேண்டும் இந்த நிலையில் நாங்கள் அடித்தளம் அமைக்க வேண்டிய முறையைப் பற்றிக் கூற முடியுமா? - ஆர்.ஜீவ பாஸ்கர், முன்னாள் எம்பி.

Answer:

நீங்கள் எழுதியதைப் பார்த்தால் முதல் 6 அடி களி மண் ஆகவும் கீழே 15 அடி வரை நெய் மணல் Fine Sand) இருப்பதாகவும் தெரிகிறது. எனினும், ஒரு JCB மூலமாக (1 Trip Pit) சோதனைக் குழி 12’  அடி வரை போட்டுப் பார்ப்பது அதை உறுதிப்படுத்தும் இது கட்டாயம் செய்யப்பட வேண்டும். இந்த அடிமண்ணில் உங்களுடைய கட்டத்திற்கு அடிப்பெருத்த குத்துத் தூண் (Under Reamed Piles) கொண்ட அத்தோடு இணைத்து குத்துத் தூண் கவசம் (Pile Cap) இணைந்து அடித்தளம் அமைப்பது சரியாக இருக்கும். 

 

எப்படியும் தகுதியும் திறமையும் வாய்ந்த ஒரு பொறியாளரின் மேற்பார்வையில் இத்தகைய அடித்தளத்தை அமைப்பது நல்லது. 

 

(இதுபற்றி மேலும் விவரம் அறிய கட்டுமானப் பொறியாளர் சூன் 2019 இதழை வாங்கிப் படியுங்கள்)

Q: ஹாலுக்கு எந்த அளவு? அய்யா! 1000 ச.அடியில் ஒரு ஹால் 2 படுக்கையறைகள் கொண்ட வீடு கட்ட இருக்கிறேன். நான் ஹால் அளவு எவ்வளவு வைக்க வேண்டும்? ஏனென்றால், 18க்கு 25 என விசாலமாக கட்ட வேண்டும் என்பது என் அவா. என் பொறியாளரோ ஹால் அமைப்பதற்கென்று சில ஐடியல் அளவுகள் உள்ளன அதன் படி தான் கட்ட வேண்டும் என என் ஆசைக்கு தடை போடுகிறார் எது சரி? அந்த ஸ்டாண்டர்ட் அளவுகள் என்ன? - அமுதன், வழக்கறிஞர், எண்ணூர்.

Answer:

1000 ச.அடி உள்ள வீட்டின் வரவேற்பு அறைக்காக 16’ X 20’  அளவில் அமைக்கலாம் . இதுவே போதுமானது. மனையடி சாஸ்திரத்தில் குறிப்பிடப்படும் அளவுகளில் அமைத்தலும் சரிதான். ஆனால் நீங்கள் நினைப்பது போல 1000 ச.அடி வீட்டில் 450 ச.அடி வரவேற்பு அறை மிகப் பெரியது. மற்ற அறைகளுக்கு இடம் போதாமல் போய்விடும். எனவே, உங்கள் பொறியாளர் சொல்வதை கேளுங்கள்.