ஆன்லைன், முறையிலான பத்திரப்பதிவில், கட்டணம் செலுத்தியவர்களுக்கு, டோக்கன் எண் கிடைக்காததால், பதிவுக்காக , சார்-பதிவாளர் அலுவலகத்திற்கு வந்தவர்கள் பாதிக்கப்பட்டனர்.

தமிழகத்தில், பத்திரப் பதிவு பணிகள் , பிப்., 12ல், ஆன்லைன் முறைக்கு மாற்றப்பட்டன.

அதைத் தொடர்ந்து, திருமணம்,சங்கம் உள்ளிட்ட இதர வகை பதிவு பணிகளும், டிச., 10 முதல், ஆன்லைன் முறைக்கு மாற்றப்பட்டன.
துவக்க விழாவுக்கு பின், புதிய நடைமுறைகள்  நேற்று முதல் அமலுக்கு வந்தன.

இந்த நடைமுறையில், பதிவுக்கு வருவோர், அடிப்படை கட்டணமான, 150 ரூபாயை, இ-பேமென்ட் முறையில் செலுத்தினால் தான், டோக்கன் எண் ஒதுக்கப்படும்.
இதன்படி, நேற்று கட்டணம் செலுத்தியவர்களுக்கு, டோக்கன் எண் கிடைக்கவில்லை என, கூறப்படுகிறது.

இது குறித்து, தமிழ்நாடு பத்திர எழுத்தார்கள் சங்க நிர்வாகி, கண்ணன் கூறியதாவது:

ஆன்லைன் முறையில்,அடிப்படை கட்டணத்தை செலுத்திய பின், அடுத்த நிலைக்கு செல்லாமல், கணினி திரை முடங்கி விடுகிறது.இதில், மீண்டும் கட்டணம் செலுத்தினாலும்,டோக்கன் எண் கிடைக்காததால், பதிவு பணிகளை மேற்கொள்ள முடியவில்லை.

மதுரை உட்பட பல்வேறு மண்டலங்களிலும், இதே போன்ற குறைபாடு ஏற்பட்டு உள்ளது. யாரோ சிலர் தவறு செய்தனர் என்பதற்காக, அனைவரையும் தண்டிக்கும் வகையில், பதிவுத்துறை நடவடிக்கை எடுத்துள்ளது.இவ்வாறு அவர் கூறினார்.

இது குறித்து, பதிவுத்துறை தலைவர், குமரகுருபரன் கூறியதாவது:

முறையான பத்திரபதிவுக்கு வருவோருக்கு மட்டுமே, டோக்கன் எண் ஒதுக்கப்பட வேண்டும்.
முறைகேடுகளை தடுக்க, இ-பேமென்ட் முறையில் கட்டணம் செலுத்திய பின், டோக்கன் எண் ஒதுக்கப்படும். இதற்காக, அனைத்து வங்கிகளும் இத்திட்டத்தில் இணைக்கப்பட்டுள்ளன.

குறிப்பிட்ட சில வங்கிகளின் கணக்கில், கட்டணம் செலுத்தியோருக்கு, டோக்கன் எண் கிடைப்பதில் சிக்கல் ஏற்பட்டுள்ளது.
இந்த குறைபாடுகளை உடனடியாக சரி செய்து வருகிறோம்.மக்கள் எவ்வித பிரச்னையும் இன்றி, இத்திட்டத்தை பயன்படுத்த நடவடிக்கை எடுத்து வருகிறோம்.
இவ்வாறு அவர் கூறினார்.