ஒவ்வொரு துறையும் அதன் இலக்கில் வெற்றிப்பயணத்தைத் தொடர அத்துறைத் சார்ந்த சங்கம் என்னும் ஒருங்கிணைப்பும் ஒற்றுமையும் மிக அவசியம். இங்கு மதுரை, தேனி, பழனி, திண்டுக்கல், ஒட்டன் சத்திரம் ஆகிய ஊர்களில் உள்ள கட்டுமானப் பொறியாளர் மற்றும் கட்டுநர் சங்கங்கள் தங்கள் சங்க வரலாறு மற்றும் செயல்பாடுகளைப் பற்றி பெருமையாக  நம்மிடம் பகிர்ந்து கொள்கிறார்கள்.

பொறி.விஜய் அமிர்த ராஜ், தலைவர் (PCEA) கட்டுமானப் பொறியாளர் சங்கம், பழனி

தென் மாவட்டங்களிலியே தொன்மையானதும் நீண்ட  கால பாரம்பரியமிக்கதுமானது எங்கள் சங்கம். 1998-ல் சுமார் 20 பொறியாளருடன் துவங்கப்பட்ட எங்கள் சங்கம் இந்த 22 ஆண்டுகளில் படிப்படியாக வளர்ந்து 75 உறுப்பினர்களுடன் வலிமையான சங்கமாக மாறியிருக்கிறது. செயற்குழு உறுப்பினர்களுடன்  மாதாந்திர மீட்டிங், 2 மாதங்களுக்கு ஒருமுறை பொது குழு மீட்டிங் என்று கட்டாயமாக்கி இருக்கிறோம்.

பழனி மற்றும் அதன் சுற்றுப்புறத்தில் உள்ள கட்டுமானதுறை வளர்ச்சியில்  எங்கள் சங்க உறுப்பினர்களின் பங்கு கணிசமானது. பொறியாளர்களின் தொழில்நுட்ப அறிவை காலத்திற்கு ஏற்றாற் போல் நவீனமாக்குவதும், மேம்படுத்துவதும் தான் நாங்கள் தொடர்ச்சியாக செய்து வரும் செயல்பாடாகும்’’.