இந்திய அளவில் சுத்தத்திலும் சுகாதாரத்திலும் முதன்மையாக இருக்க க்கூடிய நகரங்களுள், குறிப்பிடத்தக்க திருச்சியில் பாரம்பரியமிக்க  சங்கம் தான் திருச்சி கட்டுநர் சங்கம். (அகில இந்திய கட்டுநர் சங்கம் திருச்சி கிளை- பி.ஏ.ஐ, திருச்சி).

1982 ல் துவங்கப்பட்ட இச்சங்கம் 36 ஆண்டு களாக திருச்சி கட்டுமானத் துறையில் மிக முக்கியப் பங்காற்றியிருக்கிறது. அரசு பொதுப்பணித்துறை ஒப்பந்ததாரர் திரு.சி.ஆர்.சந்தானம் என்பவரின் முயற்சியால் இச்சங்கம் துவங்கப்பட்டு இன்று வரை கட்டுநர்கள், ஃபிளாட் புரோமோட்டர்கள், ஒப்பந்ததாரர்கள் போன்ற பல்வகைப்பட்ட கட்டுமானத் துறையினர் அங்கம் வகித்து சுமார் 660 உறுப்பினர்களோடு திருச்சி கட்டுமானத்துறை வளர்ச்சியை நிர்ணயிக்கும் மாபெரும் சக்தியாக இயங்கி வருகிறது.

திருச்சி கட்டுநர் சங்கத்தின் தற்போதைய தலைவர் திரு.சிவஞானம் அவர்களிடம் பேசிய போது, ‘‘அகில இந்திய கட்டுநர் சங்கத்தின் பல்வேறு கிளைகளிலேயே திருச்சி கட்டுநர் சங்கம் தான் எண்ணிக்கை அளவில் நான்காம் இடத்தில் இருக்கக் கூடிய பெரிய சங்கம் ஆகும். தமிழகத்தில் இரண்டாம் இடத்தில் இருக்கிறது. கட்டுமானத்துறை தொடர்பாக பல்சங்கங்கள் இருந்தாலும் எங்கள் சங்கம் தான் அனைத்துச் சங்கங்களின் தாய்ச் சங்கம் ஆகும். எங்கள் சங்கத்தில் உறுப்பினர்களாக இருக்கக் கூடியவர்கள் பல்வேறு சங்கங்களில் உறுப்பினர்களாக இருக்கிறார்கள். 

அப்படி பல சங்கங்களின் பிரச்சினைகளுக்கும் ஒட்டு மொத்த சங்கங்களின்  பிரச்சினைகளுக்கும் எங்கள் சங்கம் தொடர்ந்து குரல் கொடுத்து வருகிறது. இதன் தலைவராக நானும் செயலாளராக திரு.டி.ரமேஷ், பொருளாளராக திரு.நஸ்ருதீன் பொறுப்பு வகிக்கிறார்’’ எனக் குறிப்பிட்டவர் சங்கத்தின் செயல்பாடுகளைக் கூறும்போது ‘ஆண்டிற்கு 6-7 ஜெனரல் பாடி மீட்டிங்கை நடத்துகிறோம் அதில் தொழில் தொடர்பான பிரச்சினைகள், தீர்வுகள், புதிய திட்டங்கள், எதிர்கால மேம்பாடுகள் பற்றி பேசி விவாதிக்கிறோம். கட்டுமானத் துறையை பாதிக்கிற பொது பிரச்சினைகளை அரசின் கவனத்திற்கு உடனுக்குடன் கொண்டுச் செல்லும் கருவியாக செயல்படுகிறோம். 

ஆண்டுதோறும் அக்டோபர் மாதம் கட்டுநர் தினத்தை விமரிசையாக கொண்டாடி வருகிறோம். இதில் எங்கள் உறுப்பினர்களாக இருக்கக் கூடியவர்களின் நிறுவனங்களில்பணியாற்றும் தொழிலாளர்களை அழைத்து அவர்களுக்குத் தேவையான மருத்துவ, இரத்த, கண், நுரையீரல், டிபி போன்ற பரிசோதனைகளை மேற்
கொள்கிறோம்’’ என்றார் திரு. சிவஞானம்.